ຄວາມສຸກບໍ່ໄດ້ຂື້ນ ມີລົດເກງງາມ
ມີຫໍໂຮງເຮືອນສູງ ໃຫຍ່ໂຕພຽງຟ້າ
ມີເງິນຕຣາມາໃຊ້ ຫລືເປັນນາຍມີຕຳແໜ່ງ
ຈິ່ງຊິມີສຸກລົ້ນ ມີຮອຍຍີ້ມເບີກບານ ຈິງບໍ?
ລາງຄົນຍ່າງຊຸກລໍ້ ຕະຫລາດໃນເມືອງ
ລາງຄົນທຳນາສວນ ປູກພຶດພັນຜືນກວ້າງ
ລາງຄົນໄປຫາຈ້າງ ກຳມະກອນແບກຫາບ
ນອນເຮືອນຕູບຕາບຂ້າງ ກໍຍັງຍີ້ມຢ່າງເບີກບານ ຫັ້ນເດ
ຂ້ອຍວ່າຄວາມສຸກນີ້ ມັນຢູ່ຄວາມພໍໃຈ
ແສນຊິມີເງິນຫລາຍ ຜິດຖຽງກັນເລື້ອຍ
ເຖິງວ່າມີເງິນໜ້ອຍ ແຕ່ພາກັນຮັກຫໍ່
ບໍ່ຫາລາຍລັກຫລີ້ນ ຜືນຂໍ້ຮີດຄອງ ກໍດີແລ້ວ
ຄວາມສຸກຖ້າຫາກຮູ້ ສະແຫວງຊອກກໍມີຫລາຍ
ຂໍພຽງຢ່າກະທົບຕົນ ກັບຄົນຄຽງຂ້າງ
ຫັດນິດໄສເປັນຄົນໃຫ້ ຄວາມດີແກ່ຜູ້ອື່ນ
ຄວາມດີນັ້ນຈະກັບຄືນ ຄົນອື່ນເຮັດແບບເຈົ້າ ສັງຄົມນີ້ສຸກຮ່ວມກັນ ດີບໍ?
